Aleluya, aleluya. Umukama yavuze ati: «Kuva ubu, nzobita abakunzi banje;

ivyo nahawe na Data vyose narabibamenyesheje.» Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Luka (10, 1-12)

Muri irya misi, Umukama atora abandi bigishwa mirongo indwi na babiri, arungika babiri babiri ngo bagende imbere yiwe mu bisagara no mu kigwati cose aho yagira aje hose.

Arababwira ati: «Ivyimburwa ni vyinshi, yamara abakozi ni bake. Sabe rero Nyenumurima, arungike abakozi benshi mu murima wiwe. Gende, rabe ndabarungitse nk’intama mu mfyisi. Ntimutware umupfuko w’amahera canke isaho canke inkweto, no mu nzira ntihagire uwo muramutsa. Inzu yose muzokwinjiramwo, ubwa mbere muvuge muti: “Amahoro muri iyi nzu!” Na ho nihaba hari umuntu akwiye amahoro, amahoro yanyu azomujako; ahandi ho, azobagarukako. Iyo nzu nyene muzoyigumemwo, murya munywa ivyo basanganywe, kuko umukozi aberwa n’impembo; ntimute umuhana mutora uwundi. Ikigwati cose muzokwinjiramwo bakabazimana, murarya ivyo babazimanye; kandi muhakirize abarwaye, mubabwire muti: “Ubwami bw’Imana burabegereye.” Na co ikigwati cose muzokwinjiramwo ntababazimane, muraca muhava, mugeze ku nama, muvuge muti: “N’uyo mukungugu twahanduye turawubakunkumuriyeko, ariko nimubimenye: Ubwami bw’Imana bwashitse.” Ndababwiye ni ukuri: Umusi uri izina, ico gisagara kizorusha guhambarirwa Sodoma.»