Ivyo dusoma mu gitabu ca Mwene Siraki (35, 1-12)

Uwuzigama amabwirizwa ni we agwiza amashikanwa,

uwihambirira ku mategeko ni we ahereza inkuka.

Uwufitiye abandi imbabazi ni we ashikana ishikanwa nyaryo,

uwutabara aboro ni we ahereza inkuka y’ishimwe.

Ukwikura ku kabi ni kwo kunezereza Umukama,

uguhunga akarenganyo ni kwo guhereza inkuka y’iciru.

Nturenguke imbere y’Umukama iminwe igaragara,

kuko ivyo vyose ari we abitegeka.

Ishikanwa ry’umuntu w’intungane rirahimbara uruhimbi,

akamotera karyo kaduga imbere ya Rudasumbwa.

Inkuka y’umuntu w’intungane irashimwa n’Imana,

icibukirizo cayo ntikizokwibagirwa.

Ninahaza Umukama utiziganya.

tanga ku vyo wimbuye utitangiriye itama.

Igihe cose utanga imperezwa, ubigirane akamwemwe,

ic’icumi ugishikane n’urweze.

Ushime gusubiriza mu ndumane Rudasumbwa,

utiziganya kandi uko ushobora kwose.

Kuko Umukama ahora atugerera ku vyo twamuhaye,

akadusubiza indwi ku vyo twamuhaye nyene.

Ntugerageze kumuhera n’amashikanwa, aravyanka;

reka kwishimikiza inkuka y’akarenganyo,

kuko Umukama ari umucamanza

atagira nkunzi.

Icit.: Uwukurikira Umukama,

         ni we azoba aninahaje Imana Data. [IZABURI 49 (50) 1.5, 7-8, 14.23]

Umukama aravumera, akarengukisha isi,

kuva mu buseruko gushika mu burengero:

« Nimunkoranirize hano abantu banje

basezeranye nanje mu gutanga imbagwa

Tege amatwi, bantu banje, ngira mvuge,

kandi nawe Israyeli ndakuburanya,

Jewe Mana, Imana yawe.

Singuhora inkuka,

imbagwa zawe zimpora mu maso

Hereza Imana inkuka yo gukenguruka,

rangura indagano waraganye n’Uwo mw’ijuru.

Uwumpereza inkuka yo gukenguruka ni we aba aninahaje,

umuntu w’intungane nzomurangira urukiza ruva ku Mana.»

Aleluya, Aleluya. Kubera Inkuru nziza twashikirijwe, Imana iduharhagarira gusangira ubuninahazwa n’Umukama wacu Yezu Kristu. Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Mariko (10, 28-31)

Muri irya misi,

Petero yaritoye abarira Yezu ati: «Tweho, ni ivyo ubona, twarahevye vyose turagukurikira.» Yezu na we yishura ati: «Ndakubwiye ivy’ukuri: nta wuzoheba inzu, benewabo, bashikiwe canke se canke nyina, abana, imirima, ku bwanje no ku bw’Inkuru nziza, ngo asibe ataronse ijana ubu muri iki kivi, amazu, benewabo, bashikiwe, abavyeyi, abana, imirima, n’aho uruhamo rwobagwako, n’ubuzima budahera mu myaka yose. Aba mbere rero benshi bazoba aba nyuma, na bo aba nyuma baje imbere.»