Ivyo dusoma mw’Ikete rya mbere Umutumwa Pawulo yandikiye Abanyakorenti (15, 1-11)

Ncuti zanje,

Ndasubiriye kubibutsa ya Nkuru nziza nabamenyesheje ari yo mwakiriye mugahagararamwo ari yo idahengeshanya kubakiza nimwayigumya nk’uko nayibamenyesheje: ahandiho, mwoba mwemereye ubusa.

Ni uko rero, nabashikirije ubwa mbere ivyo nanje nashikirijwe: Ko Kristu yapfuye kubera ibicumuro vyacu nk’uko vyari vyaranditswe, ko yabambwe, hanyuma akazuka ku musi ugira gatatu, nk’uko vyari vyaranditswe, kandi ko yabonekeye Kefasi, hanyuma bamwe Icumi na babiri, akongera akabonekera bamwe benewacu barenga amajana atanu, muri bo benshi baracariho n’ubu, ariko bamwe barapfuye,  hanyuma yabonekeye Yakobo, asubira abatumwa bose. Maze, hanyuma ya bose, yarambonekeye nanje, nari meze nk’uwavutse atageze. Mbere, jewe ndi uwa nyuma mu batumwa, sinkwiye no kwitwa umutumwa kuko nahamye Ekleziya y’Imana. Ingabirano y’Imana ni yo yangize uko ndi, kandi ingabirano yayo nagiriwe ntiyampfuyeko ubusa, ariko naratamye kubarusha bose: mbere, si jewe, mugabo ni ingabirano y’Imana iri muri jewe.

Koko, ari bo ari jewe, uko ni ko twama twigisha, uko ni ko mwemeye namwe. 

Icit.: Shemeze Umukama, kuko ari mwiza. (IZABURI 117 (118) 1-2, 16-17, 28)

Shemeze Umukama, kuko ari mwiza,

kuko ubuntu bwiwe bwamaho imyaka yose.

Umuryango w’Israyeli n’uvuge uti:

ubuntu bwiwe bwamaho imyaka yose.

Ukuboko kw’Umukama kwarakoze ibitangaza,

ukuboko kwiwe kwaratsinze.

Sinzopfa nzohoraho,

kandi nzohayagiza ibikorwa vy’lmana.

Ni Wewe Mana yanje, nzogushemeza:

ngushimagize, Mana yanje!

Shemeze Umukama, kuko ari mwiza,

kuko ubuntu bwiwe bwamaho imyaka yose. 

Aleluya, aleluya.

Imana ni yo yatumye abantu b’isi buzura na yo muri Kristu,

yongera idushiramwo ijambo ry’ubwo bwuzure.

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Luka (7, 36-50)

Umusi umwe, umwe mu Bafarizayo arahamagara Yezu ngo aze amuzimane. Yezu araheza arinjira mu nzu iwe, aricara ngo afungure. Haza rero umugore yigenza nabi muri ico gisagara. Ngo amenye ko Yezu yatumiwe mu nzu y’Umufarizayo, arazana agacupa k’amavuta amota cane, aja inyuma yiwe hafi y’ibirenge vyiwe, ararira amutonyangiriza amosozi ku birenge, abihanaguza imishatsi yo ku mutwe wiwe, aza arabisoma yongera abisiga ya mavuta.

Wa Mufarizayo yamutumiye abibonye, yibwira ati: «Iyo uyu muntu aba yari umuhanuzi, yari kumenya uyu mugore amukorako uwo ari we n’ukuntu agenze, ko ari umucummuzi.» Yezu na we amubwira ati: «Simoni, hari ico ngomba kukubwira.» Na we ati: «Yaga, Mukama.»  Yezu aramwishura ati: «Hari uwari afise abamufitiye imyenda babiri: umwe yari amufitiye amadenariyo amajana atanu, uwundi mirongo itanu. Babuze ico bishura, abarekurira bompi. None, muri bompi, uwuzomukunda kuruta uwundi ni nde?» Simoni aramubwira ati: «Ngira ngo ni uwarekuriwe umwenda munini.» Yezu aramubwira ati: «Waharashe!»

Ahindukiye araba wa mugore, abwira Simoni ati: «Uyu mugore uramubona? Ninjiye mu nzu yawe, ntiwansuka amazi ku birenge; ariko we, kuva aho yinjiriye, yabibombekesheje amosozi yiwe, abihanaguza imishatsi yiwe. Ntiwansomye, ariko we, kuva aho yinjiriye, ntiyigeze ahengeshanya gusoma ibirenge vyanje. Umutwe wanje ntiwawusize, ariko we, ibirenge vyanje yabisize amavuta amota neza. Ni co gituma, ndabikubwiye, ibicumuro vyiwe vyinshi biragiriwe ikigongwe, kuko yerekanye urukundo rwinshi, ariko uwo ba rekuriye bike yerekana urukundo ruke.»

Araheza abwira wa mugore ati: «Ibicumuro vyawe biragiriwe ikigongwe.» Abo bari kumwe ku meza batangura kwiyumvira bati: «Uyu muntu arekura ibicumuro ni umuntu nyabaki?» Yezu rero abwira nya mugore ati: «Ukwemera kwawe kwagukijije, genda amahoro.»