Ivyo dusoma mu gitabu c’Umuhanuzi Yeremiya (7, 23-28)

Ng’iri iriyazwe n’Umukama: «Ivyo mbategetse ni ibi: munyumviye, nzobabera Imana namwe mumbere igihugu. Ubuhirwe bwanyu buri mu gukurikiza inzira mbategetse. Ariko ntibavyumvise kandi ntibanavyumvirije, bakurikije riho impanuro z’imishaha yabo mibi, bampaye umugongo, birabira irya. Kuva umusi ba sekuru bava mu gihugu ca Misiri, gushika n’uyu musi sinahengeshanije kubarungikira abahanuzi. Ariko ntibanyumvirije, ntibanteze n’amatwi, ibikanu baradadaje, ububi bwa ba sekuru bwo data bwaragendeka.

Ivyo vyose ubabwiye umengo ni imvura igwa mw’ishamba. Ubahamagare ngo nwe! Babwire uti: “Igihugu ntikicumvira Umukama, Imana yacu, kandi ntigishaka n’inyigisho; ibanga cemeye cararihevye”.» 

Icit.: Uyu musi, ntidikomantaze imitima yacu, nitwumvirize riho ijwi ry’Umukama. [IZABURI 94 (95), 1-2, 6-7, 8-9]

Nimuze dutere impundu Umukama,

tumusheneze We tuzeyeko urukiza!

Ingo tuje mu nyonga ziwe tumukengurukire,

tumukomere amashi tumwigine!

Shike, duce bugufi, dupfukame:

dusenge Umukama yaturemye.

Na none, ni We Mana yacu,

Natwe tukaba intara arongôye.

Uyu musi, nimwumvirize ijwi ryiwe rivuga riti:

«Ntimukomantaze imitima yanyu nka kera i Meriba,

no kuri wa musi wo mu gahinga ka Masa,

hamwe ba sogokuruza banyu bangerageza bakancaca.»

Urakaninahazwa, Kristu, Wewe Bwitonzi bwamaho bw’Imana nzima. Umukama yavuze ati:«Nimwamize yompi ibicumuro vyanyu; maze mwigirire umushaha n’umutima mushasha.» Urakaninahazwa, Kristu, Wewe Bwitonzi bwamaho bw’Imana nzima.

Ivyo dusoma mu Nkuru Nziza ya Yezu Kristu nk’uko yashikirijwe na Luka (11, 14-23)

Muri irya misi,

Yezu yariko arirukana ishetani, nya shetani ikaba ikiragi. Isohotse, ca kiragi gica kiravuga; ishengero na ryo rigwa mu gahundwe. Mugabo bamwe muri bo bagira bati: «Yirukana amashetani kubwa Belizebuli, umwami w’amashetani.» Abandi na bo, kugira ngo bamugeze, bamubwira bati: « Twereke ikimenyetso kivuye mw’ijuru.»

We rero yari azi ico biyumvira, ababwira ati: «Ubwami bwose budashira hamwe buzohona, amazu na yo agwaneko. Ko mugize ngo nirukana amashetani ku bwa Belizebuli, none shetani niyaba iriko irirwanya, ubwami bwayo buzorama bute? Ngasangwa nanje nirukana amashetani ku bwa Belizebuli, abana banyu bayirukanisha iki? Ni co gituma bazobabera bo nyene abacamanza. Yamara ugasangwa nirukana amashetani ku bubasha bw’Imana, Ubwami bw’Imana bwabashikiriye.

«lyo umugabo akomeye, ari n’umuheto, araririye urugo rwiwe, ivyiwe ntakibikakaza. Ariko haramutse haje uwumurusha inguvu akamutsinda, aca amwaka wa muheto yari yishimiye, kandi ivyo amwambuye akaja arabigaba.

«Uwo tudashize hamwe aranyanka, uwo twimburira kubiri arasesagura.»